لاورا
پاڵنگه شێعرێش وه‌ش نمه‌یا
لاورا ماچۆ : شیعره‌كێ تۆ
و
پاڵنگه ئاورا و تووڕه‌كێ
ئه‌و یۆی كه‌را
لاورا ماچۆ : شه‌وه ئاما
من فره ته‌رسوو زریكه‌كاشا .
هه‌ر پنه‌م ماچۆنه و هه‌ر ماچۆ :
كه منویسی ،
بنویسه باڵوو كاوه‌ترا
بنویسه ده‌نووكوو مریچڵا
یا خۆ روۆ گوڵیوی بنویسه
چغ ئه‌و چه‌پۆڵه‌و پاڵنگی ؟
. . . جا چێش كه‌روو . . . ئه‌رێ لاورا !
من هه‌رگێز پاڵنگ نه‌بێنێ
نه به ده‌نگ
و
نه چه‌پۆڵه
و
نه به سیما
به‌ڵام دامێ هه‌رچوار ده‌وریم . . .
ئه‌رێ لاورا . . .
تۆ ئا دامێته ویر نه‌شا
لاورا
به هاوار و ده‌نگه‌ده‌نگوو كه‌مه‌ره‌كام
به په‌یوه مدره‌ی ته‌وه‌نام
به ده‌نگی به‌رزوو داره‌كام
فره تووڕێ بۆ
لاورا ماچۆ :
یه‌واش واچه
مه‌به به ده‌نگوو شێته‌كا
مه‌به رۆخانه‌و زمسانی
ده‌نگه‌كێت با به‌رزێ نه‌با
یه‌واش ، یه‌واش ، یه‌واش واچه
. . . جا چێش كه‌روو . . . ئه‌رێ لاورا !
منیچ هه‌میشه
شه‌ماڵم جه وا تننه‌كا
و
مانگه‌شه‌وه‌م جه گێجاوی
وه‌شته‌ر مه‌یا
به‌ڵام ئاخر قه‌ناره‌كێ . . .
قه‌ناره‌كێ چوار مه‌رگیم
ئه‌رێ لاورا ! . . .
تۆ قه‌ناره‌كێت ویر نه‌شا
لاورا
جه وڕاوه وڕاوه‌كه‌و شه‌وام
جه جووڵه جووڵوو خیاڵه‌كام
جه ته‌قه‌و هۆڕێ و ئاما و لوای
كۆڵوو خه‌مام
شێته بیێنه
خه‌ریكه‌نه كه بازۆم جیا
لاورا ماچۆ :
بۆ ئارامی گنه‌وه پاڵێ
و
به ئارامی وه‌رمێ وینه
و
پێسه ئی خه‌ڵكیه بیژیه‌ره.
. . . جا چێش كه‌روو . . . ئه‌رێ لاورا !
منیچ هه‌ر حه‌ز پانه‌یه كه‌روو
كۆتڵه هه‌ورێوی شل و مل
سه‌رینگام بۆ
منیچ هه‌ر حه‌ز پانه‌یه كه‌روو
پێسه ده‌نگوو به‌له‌مێوۆ سه‌روو ده‌ریای
جه شه‌وێوه دڵنیانه
به ئاسمانی سایێقه و پاك
له‌ره‌م نه‌بۆ
به‌ڵام لاورا ! . . . ئاخر لاورا ! . . . ئه‌نفاله‌كێ
تۆ ئه‌نفاله‌كێت ویر نه‌شا
لاورا
فره قینیش مه‌ی ده‌نگوو گره‌وه‌ی
و
ده‌نگوو شیوه‌نی و خه‌مباری
لاورا ماچۆ :
ئی ته‌م و مژیه لابه‌ره
كه گێرته‌نش وه‌روو چه‌مات
دا ئا په‌رده‌یه هۆر ده‌وه
كه كێشیان ئه‌و سه‌روو خه‌مات
رۆشن به‌وه
پێسه چه‌رماو چه‌مه‌كاو من رۆشن به‌وه
پێسه زوڵفه‌كاو من درۆشیه
و
پێسه ونۆ من قۆڵپێ پێكه
و
پێسه چه‌رمایی لامله‌كام
شه‌وقێ ده‌وث .
. . . جا چێش كه‌روو . . . ئه‌رێ لاورا !
منیچ حه‌ز كه‌روو
شه‌پۆلۆ خوه‌ی به‌رۆمه‌وه
فره حه‌ز كه‌روو
پرشنگه‌كێ گۆرانیه‌كا پۆژنامه‌ره
و
حه‌ز كه‌روو بوو
گه‌ڵا شیعرێوه باڵ گێرتێ نیمه شه‌وێوۆ ئاسمانی
به‌ڵام لاورا ! . . . ئاخر لاورا ! . . .
تۆ هه‌ڵه‌بجه
تۆ هه‌ڵه‌بجه‌ت ویر نه‌شۆوه
لاورا
هه‌رگێز گه‌ره‌كش نیا
روۆ شێعره سیاسیه‌كام وینۆ
لاورا حه‌تا جه فه‌ره‌و جارا
یانه‌مه‌نه به‌رشا كه‌رۆ ،
دیسان حه‌تا جه فه‌ره‌و جارا
چه‌كشا كه‌رۆ
و
سجیله‌كاشا سۆچنۆنه
و
نیشانه‌كاشا هۆرمارؤۆ
لاورا ماچۆ :
گه‌رده‌لوولوو سیاسه‌تی
وه‌ختێو كه مه‌ی
رۆحوو شیعره‌كا سیس كه‌رۆ
ئاڵشته‌كێشا وشكه بۆ
لاورا ماچۆ :
ئا شیعرێته
یانه‌و منشا په‌ڕكه‌رد دووكه‌ڵ
جه بۆپڕووزوو غه‌ریبی
و
جه بۆبرامۆو گووگردێ و ونێ
و جه به‌رزوو نزمی ته‌نیایی
ئا شیعرێته
بووڵه جه سه‌روو كۆرسیه‌كه‌یم
جل و به‌رگ
و
مه‌لافه‌ی پاكم جیا مازا
سه‌روو قاڵیۆ یانه‌یمه‌وه
یاگه پای ونینێ جیا مازا
چه‌نی وێشا
هه‌ڕ و لیته‌و كۆچی مارا دلێ داڵانیم .
. . . جا چێش كه‌روو . . . ئه‌رێ لاورا !
سیاسه‌ت لا ئێمه لاورا !
جه پێچه‌نه‌و دلێ بێشكێنه هه‌تا كه‌فه‌ن
پیچیان له‌ش و باڵاماوره .
ئه‌ری لاورا ! . . .
گرد روێو ئێمه نان و مه‌راق
چه‌نی سیاسه‌تی موه‌رمێ .
ئه‌رێ لاورا ! . . .
حه‌تا جه ژه‌ناما زیاته‌ر
چه‌نی سیاسه‌تی مووسمێ .
ئه‌رێ لاورا ! . . .
فره‌ته‌ر جه زاوڵه ورداما
چه‌نی ئادیا كه منیشمێره .
ئه‌رێ لاورا ! . . .
به‌ڵام لاورا ! . . .
ئاخر لاورا ! . . .
كورده‌سانم . . .
كورده‌سانم . . .
كورده‌سانت ویر نه‌شۆوه .
با تشکر از آقای عبدالله حبیبی
